1Jo 2 | AMP | STEP | Bar yinouroko, nann ndar gontwat wandfiwanko. Kanga akfo hta nuhasanko. Mirahko fasoh fasoh nefm ananom. Be toh hanyhato wom fasoh neft mnent, tor nmoh wom toh tario yimar. Tor Bro Yifemrpno tohwor. Nd yimar Jisas Kraiser. Tu dborioh yima mifer. Nom niwa fasoh fasoh nefm tfit rorn Bro Nkifrarpno rhuhato kfo kangrr, “Nd yimaroh nefm nann bi suh nanyormoyanm. Mirahn tfit adukahiyanm.” Rorn nd mrokfom kak hta bohta marnyewurm.

1 John 2

Kraisr nmoh toh tario yimayer

1 Bar yinouroko, nann ndar gontwat wandfiwanko. Kanga akfo hta nuhasanko. Mirahko fasoh fasoh nefm ananom. Be toh hanyhato wom fasoh neft mnent, tor nmoh wom toh tario yimar. Tor Bro Yifemrpno tohwor. Nd yimar Jisas Kraiser. Tu dborioh yima mifer. Nom niwa fasoh fasoh nefm tfit rorn Bro Nkifrarpno rhuhato kfo kangrr, “Nd yimaroh nefm nann bi suh nanyormoyanm. Mirahn tfit adukahiyanm.” Rorn nd mrokfom kak hta bohta marnyewurm.

2 Rorn nmoh ufasoh nefmpno nohmor. To niko mirahko ka be nmoh nefrpamn nohmorm, nhai mif. Nda dodh bbinysof bugathu met yindari bugaroh nefm noh bugamorm.

Yimar Bro Nkifrarpno brbo frtkafetr, nd yimar kak hikwort tu Bro Nkifrarhu thfa mntwathu mrokfot

3 Bro Nkifrarhu thfa mntwathu hikneftpno, Bro Nkifrar hti duka tawisafwonomr.

4 Wom yimar kfo kangr, “Na bi Bro Nkifrar tawisafwanr.” Tfit rorhu wiyau yau toh nmbuhat nhai Bro Nkifrarhu thfa mntwat kfiwa mrokfo yuhat hik marnyakahrt, nd yimar be tngrpatn furewur. Nhai tu kfo mif mifkahr.

5 Yimar Bro Nkifrarhu mrokfom hiketr, Bro Nkifrar rorhu yima yuhur korhr. Yimar kfo kangr, “Na Bro Nkifrarhu mrokfom kak hikwa.” Inji kfet yimar tu Jisas Kraisrhu wura tfi yuhatn yau hikkfot. Jisasrhu wura tfi yuhat yau hikhato nom htiruhanomn kfo mirahnom, awi, Bro Nkifrarhu toheft toh hikwor.

7 Bar yinouroko, nd yima nayak marnyanefthu mrokfot na wandfiwat, mirahko ka nfri mrokfoyet. Nhai. Nda mrokfot bi niko Kristenko riwanyakmo mrokfoyet.

8 To nda mrokfot tu mna yimbu yuhettn, ndnatn nfri mrokfot kanjo wandfiwanko. Nda mrokfot bingot tu yafothett rhumot. Kraisr nd mrokfot hikhato bro hingrneft hingr-namor. Yo niko nd mrofkot wanyhato yifung kspitathu ufasoh nefm htany-hato Brorhu nukeftn wiyauyauwoko.

9 Wom yimar kfo kangr, “Na Bro Nkifrarhu mar nukefrn tohwa.” Inji kfet yimar tfit wom Kristenm hti srthuworm, nd yimar nhai mar nukefr tohkahr. Yuhre kspitat tohwor.

10 Yimar wom Kristen yimampno nayak marnyahato rpat tohwar, tor nd yimarn Bro Nkifrarhu mar nukeftn tohwor. Mar nukeft tohyuk yimar nhai suhkahr.

11 Yimar wom Kristen yimam hti sretr, nd yimar afo yifung kspthu nefm tohwor. Yiro yifung kspt tohwarn nyinga kunyjetm kanjo tur yiyuk yihotat nhai hti dbtakukahrt.

12 O niko, nanhu yonenko, Bro Nkifrarko Kraisr nohmo nmbuhat mhtiyakhato nikmoh fasoh nefm bi fak wus bowus thumorm. Ndnetann gontwatn wandfahato kfo nuhas-wanko.

13 Niko bro yimako bi kriyany hmbreyetko, niko bi htimokomr, nd bi ritohngotakmo yimar. Ndar gontwat nikmoh yufampno rpat niewut.

Yo niko damiag yimako, Bro Nkifrarhu bbuka rifhur hatohhato Satanr yahot tkaftahato toh bmtewako, niko inji buga gontwat nikmoh yufam-pno niewut.

14 Nanhu yonenko, bi Bro Yifemr-pno frtkafetko, nikompno ndar gontwat wandfiwanko.

Niko bro yimako bi kriyany hmbreyetko, niko bi htimokomr, nd bi ritohngotakmo yimar. Ndar gontwat nikmoh yufampno rpat niewut.

O damiag yimako, niko toh bmte-wakomn Bro Nkifrarhu mrokfot yakitohhato nd mrokfotn kak hta bohtewutm nikmoh wiyauyau nmbu-ham. Ror toh tkafwatrko Satanr bi fahot tkafmokomr. Ndnetann ndar gontwat wandfiwanko.

Bbinysofthu fasoh nefm yima yuhum sinya duha

15 Ndnetann kfiwanko mirahko ndar bbinysofti rot haruhwa fasoh fasoh nefm ahti yuhurkahnomn nd fasoh nefmn arim tohninom. Ndar bbinysofthu fasoh nefmn rim toh-nirahko, to be nhai tfit kekutakhato tfit Bro Yifemrpno nieruhatko. Nhai.

16 To mirahko ka tamoh nefm kfiwur-nom rim tohnineft. To nd nyingaye htihato tfit yima yuhu sinyewohat yo thatipm mwofnnita nefm newohat ee tamoh tamoh nefmpno o wuskampno yufam kfo hagrha bohagrhiwa nefm, nd nefm nhai Bro Yifemrpno niakahm. Nhai. Nd nefm be nda bbinysoftuhem.

17 Nda bbinysoft mibatiniraht. Yo nda bbinysoft yorhwa fasoh nefm yimam mhti wofnnihato niwam, ndm rpat mibati buganirahm. Yimam tu Bro Nkifrarhu dukef yuhatn toh hikwam, romn toh nkifranirahm.

Kraisrhu hti dbnotyuk yimam bi htitkomm

18 Nanhu yonenko, niko wany hnamo mrokfot kfo memot, bbiny-softhu mibatini yihar Kraisrhu hti dbnotyuk yimar, kutewumr Anti Kraisr, nierahr. Arihar bi htitko bok yimam Kraisrhu hti dbnotyukm bi mfnah hanitm. Ndnatn nom duka kangnom nda bbinysofthu mibatini yihar bi brbohwor.

19 Nd Kraisr hti dbnotwa yimam afo nompno rpat toh hnamounom. To tfit arihatn bi frfnah-wom. Rom nompno toh hnamohat nhai tu Kraisrhu yima yuhurn toh hnarmom. Tu Kraisrhu yima yuhurn atoh hnam, nhai inji frfnahrmotm. Bi frfnahmotm, ndt htihato kangnom, Kraisrpno be inji toh tariowakmoum. Nhai tu yarim fnahna bugarmom.

20 To nikom nhai nd Kraisr hti dbnotet yimam kanjo tohkahko. Nhai. Kraisrn Bro Nkifrarhu Yafothar yak-hato yiro yima yuhum htewurko. Nd Yafotharn thu nawohwatrko dborioh yima yuhur niawatr Bro Nkifrarhu tu mrokfom duka dbtak hik bohikwo-komm.

21 Ndar gontwat nikompno wandfiwa nmbuhat mirahko ka Bro Nkifrarhu mrokfot yak mumiwatkomt na wandfiwanko. Nhai. Niko Bro Nkifrarhu mrokfot bi hti hik bohikwo-komt. Hti hikhato kfo kangko, “Nd Bro Nkifrarhu mrokfot tu kfo mif kfoyet.” Nd nmbuhatpno na wandfiwanko.

22 Yimam kfo furayetm to frohem? To nd yimam kfo yamukam, mirahko amanyom Jisasr ka nmoh hbhakyuk yima Kraiser. Nhai. Tom inji kfet yimamn Bro Yifemri rorhu Yonr mong trohhato hti dbnotwomf.

23 Yimar Yinemr frtrohwor, to be Yifemrn frtrohwor. Yimar Yinemr frtkafwor, to be Yifemrn frtkafwor.

Kraisrhu tu kfo mif mrokfom Bro Nkifrarhu Yafothar kak nuhas bonuhaswornom

24 Nd bingot niko Kristenko ritohak-hato riwanyakmo mrokfot, ndtn wayakitoh kih hanyswako. Yakitoh hanyrahkomt, be Bro Yifem nitohfpno rpat frtkafhato tohrahko.

25 Bingot Kraisr bi kfo hta memornom, “Dborioh rhu nmbuhat hiruhanko. Hirhotanko be nd dborioh rhu nmbuhatn rhu nkifranirahko.”

26 Yimam yi mfrnhehwatmko, ndnetann nda kfo duka mrokfot wandfiwanko.

27 To tfit wom dukefr duka kanga, bi Kraisr Bro Nkifrarhu Yafothat thu hmbremotrm bi nd Yafothatn rroh toh nmbuham kak hta bohtaf hanittm. Ndnettn nhai wom yimam yihato mfrnhehruhatmko. Bro Nkifrarhu Yafotharpatn kak nuhas bonuhas marnyewutko tamoh tamohm. Nd Yafothat kfoyuk mrokfom tu kfo mif mrokfom kfiwutko. Niko mirahko ka kfo fura kfoyem. Ndnettn niko nd Bro Nkifrarhu Yafothat kfoyuk tng yuham yak hikhato Kraisrpno brbo frtkafkfot.

Arihat bi Bro Nkifrarhu yonenom

28 Yo nanhu yonenko, nikom Kraisrpno brbo mfrtkafkfot. Inji naneft rorhu fnahnayuk yihar nom nhai yimtnakhato tpikr yihom nahmbri-ruhatnom. Nhai. Nom be bro yindho-rpampno tafont tohhato htiyakrahnomr. Nhai yimtnayefmpno toh htiyak-ruhatnomr.

29 Nikom htiyeteko Kraisr tu dborioh yima mifer. Ndnatn nikom htikfot fitoh yimar dborioh nefm newurm, nd yimar Bro Nkifrarhu yoner.